26. maj 2015

Sermersuaq pillugu atuakkiamit kalaallit meerartaannut ikiortarialinnut 100.000 kr.-it tunniunneqartut

TUNISSUT

Atuagaq ”Indlandsisen – 80 års klimaændringer set fra luften” siorna saqqummerpoq, saqqummerneranilu tunisaanerani sinneqartoorutit Kalaallit Nunaanni meeqqanut inuusuttunullu suliniaqatigiiffimmut NANU- Meeqqanut tunniunneqarnissaat siunniunneqarsimavoq. Maanna sinneqartoorutit 100.000 kr.-it sinnersimavaat, taakkualu NANU-mut tallimanngornermi 5. juni Nuummi Katuami tunniunneqassapput. Atuagaq Københavnip Universitetiani Statens Naturhistoriske Museumip saqqummersitarivaa, Kalaallit Nunaatalu sermersuata sermillu iigartartut aakkiartornerisa annertuumik ilisimatusarfigineqarnerannut atatillugu atuakkiaalluni.

Professor Kurt H. Kjær fra Staten Naturhistoriske Museum, Københavns Universitet.

Foto: Professor Kurt H. Kjær fra Staten Naturhistoriske Museum, Københavns Universitet.

Kalaallit Nunaata misissuiffigineqarnera ukiorpassuanngortuni danskit universitetiisa qitiusumik suliaqarfigisimavaat, tamannalu kalaallit inuiaqatigiit pinngortitarlu pillugit nutaanik paasissutissiinernik kinguneqartarsimavoq. Tassungalu atatillugu silaannaap allanngoriartornera pingaaruteqarsimavoq, paasiniaanermilu tassani qitiutinneqartoq tassaavoq, Danmarkimi Kalaallit Nunaannilu ilisimasat piginnaasallu annertusiartortuarmata, kalaallinit inuiaqatigiinnit sapinngisamik iluaqutigineqarsinnaasut.

- Atuakkiamit sinneqartoorutit NANU-mut tunniunneqarnerannut pissutaavoq inuiaqatigiit suliffigisagut utertiffigerusukkatsigit. Tamanna ilisimatusarnitsinnuinnaq avitseqatiginninnissamuinnarlu tunngassuteqanngilaq. Tassami inuit atugaasigut tapersiinissatsinnut aamma akisussaaffeqarpugut, Statens Naturhistoriske Museumimi professori Kurt H. Kjær, atuakkiamissaaq aaqqissuisuusoq, oqarpoq. 

Foto: Geodatastyrelsen

Foto: Evighedsfjorden og Ujaraanaq Dalen i Sydvestgrønland 1936.Foto: Geodatastyrelsen

Atuakkiap pinngornera

1930-kkunni aasani tallimani Kalaallit Nunaata affaa sinnerlugu silaannarmiit assiliortorneqarpoq. Timmisartut imaanut mittartut atorlugit isorartussutsit nunarsuatta arlaleriarlugu kaajallannerisut isorartutigisut timmiffigineqarput. 40-nik issitsigisumi, 4.500 meterisullu qutsitsigisumiinnermi silaannakilliorfiusumi angutit immikkut sapiissuseqarluinnartut timmiffigivaat. Aatsaalli ukiut 75-it qaangiunneranni assilisat takoqqinneqarput. Ukiorpassuarni Københavnip eqqaani Vestvoldenimiissimapput, 2008-imili professorip Kurt H. Kjærip nassaarivai, taassumalu ilisimatusarnermi qanoq naleqartigineri paasigasuarpai.

1930-kkunnili Kalaallit Nunaata silaannaa annertuumik allanngoriarsimavoq, taamaattumillu sermip iigartarfiisa qanoq nikeriartigisimaneri takuneqarsinnaanngorput, assillu takutitaat satilitsiniit  takuneqarsinnaasuniit paasissutissiinerungaarput.

Foto: Hans Henrik Tholstrup

Foto: Evighedsfjorden og Ujaraanaq Dalen i Sydvestgrønland 2013. Foto: Hans Henrik Tholstrup

2013-ip aasaanerani Kurt H. Kjærip, Statens Naturhistoriske Museumimiit kiisalu Aarhus Universitetimiit ilisimatusartut allat peqatigalugit sermip iigartarfii 1930-kkunni assilineqarsimasut taakkorpiaat timmisartumiit assiliortorpaat. Kingorna ilisimatusaatit allaaserineqartarfianni allaaserineqarput, minnerunngitsumillu atuakkiaq ”Indlandsisen – 80 års klimaændringer set fra luften” saqqummersinneqarluni, tassanilu sermit iigartarfiisa sermersuullu qanga ullumikkullu isikkui takuneqarsinnaapput.

Katuami pisussaq

Atuakkiamit ”Indlandsisen – 80 års klimaændringer set fra luften” sinneqartoorutit 100.000 kr.-it NANU-mut tallimanngornermi 5. juni Nuummi Katuami tunniunneqassapput.

Bogen: 80 års klimaændringer set fra luften

Bogen: 80 års klimaændringer set fra luften

Pisussamut paasissutissat

Kurt H. Kjær atuagaq Kalaallit Nunaannilu ilisimatusarneq pillugit oqaluttuassaaq.

Qassinut: Tallimanngorneq 5. juni 2015 nal. 15.30 - 17.00
Sumi: Katuaq, Nuuk

Kaffeqarlunilu kaageqassaaq.




Attaveqarfissat:

Kurt H. Kjær
Professor
Statens Naturhistoriske Museum
Københavns Universitet
Mail: kurtk@snm.ku.dk
Tlf.: +45 30 58 97 30

Morten Meldgaard
Professor
Statens Naturhistoriske Museum
Københavns Universitet
Mail: MMeldgaard@snm.ku.dk
Tlf.: +45 28 75 10 36